Um miðjan maí fórum við mamma í Garðheima og ég keypti allskonar fræ og plastílát til að rækta blóm. Sólblóm og kryddjurtir og eitthvað fleira fallegt. Ég man nefnilega eftir því að þegar ég var fyrir austan hjá tengdamömmu þá var kona í næsta húsi svo rosalega myndarleg að rækta svona blóm í jógúrtdollum í bílskúrnum hjá sér.
Til að gera langa sögu stutta þá fengum við mamma hláturskast í dag þegar hún rak augun í ræktunina inní bílskúr. Blómin fínu líta út eins og arfi í dollu eftir allan þennan tíma og svo er hluti af þessu uppþornað. Ég hef ekki græna fingur eða hvað þarf til að rækta blóm, þetta er vægast sagt hryllingur.
Nú fer að styttast í það að Sara máli myndina á bílskúrinn hjá okkur, þá munum við drekka morgunkaffi með fjörðinn fagra fyrir augum. Við ættum kannski að láta hana mála mynd af Vestmannaeyjum á einhvern annan vegg. Það væri skemmtilegt.
Gervigrasið fína sem Bjarni keypti af Færeyingnum hressa verður sett á lóðina núna í júlí og þá á bara eftir að skipuleggja hvernig við ætlum að hafa hellulögnina og hvernig lóðin verður að sunnanverðu. Ætli við náum að klára þetta fyrr en næsta sumar 2007.
Markmið að lóðin verði fullkláruð fyrir 50 ára afmælið hans Bjarna janúar 2008.
Kveðja Inga
